கோவை: தமிழ்நாடு அரசின் சார்பில் குடும்ப அட்டைதாரர்களுக்குச் சிறப்புப் பொங்கல் பரிசு வழங்கும் நிகழ்ச்சியை கோவை மாவட்டம் சோமனூர் தொடக்க வேளாண்மை கூட்டுறவுச் சங்கத்தில், செந்தில்பாலாஜி தொடங்கிவைத்தார்.
பின்னர், 21 தொகுப்புகள் அடங்கிய பொங்கல் பரிசை பொதுமக்களுக்கு வழங்கினார். இதனைத் தொடர்ந்து, சூலூரில் பொங்கல் தொகுப்புகளைப் பொதுமக்களுக்கு வழங்கிய பின்னர் செய்தியாளருக்குப் பேட்டி அளித்தார்.
அப்போது அவர், "தமிழ்நாடு முழுவதும் இன்று (ஜனவரி 3) பொங்கல் தொகுப்பு வழங்கும் பணி தொடங்கப்பட்டுள்ளது. இதன் ஒரு பகுதியாக கோவை மாவட்டத்தில் 10 லட்சத்து 78 ஆயிரத்து 484 குடும்பங்களுக்கு, வரும் 10ஆம் தேதிவரை பொங்கல் பரிசுத் தொகை, பரிசுப்பொருள்கள் வழங்கத் திட்டமிடப்பட்டுள்ளது" என்றார்.
இழப்பீட்டை இரட்டிப்பாகக் கேட்பதா?
அப்போது, உயர் மின் கோபுரம் அமைக்கப்படுவதால் பாதிக்கப்பட்ட விவசாயிகள், போராட்டத்தில் ஈடுபடுவது குறித்து செய்தியாளர் கேள்வி எழுப்பியதற்குப் பதிலளித்த அவர், "ஏற்கனவே ஒரு திட்டத்துக்கு இழப்பீடு பெற்றவர்கள்; அந்த இழப்பீடு போதாது எனத் திட்டங்கள் நிறைவடைந்து பயன்பாட்டுக்கு வரும்போது, போராடுவது நடைமுறையில் இல்லாதது.
போராட்டத்தை வழி நடத்துபவர்கள் இரட்டிப்பாக இழப்பீடு பெற்றுத் தருவதாகக் கூறிவரும் சூழலில், அந்தக் கோரிக்கையை ஆய்வுசெய்ய வேண்டிய நிலையுள்ளது" என்று தெரிவித்தார்.
மேலும், "95 விழுக்காடு பணிகள் நிறைவடைந்த நிலையில் அவர்களுக்கு இழப்பீடு போதவில்லை என்று சொன்னால் நீதிமன்றத்தை நாட வேண்டும். இழப்பீடு வழங்குவது தொடர்பாக அரசு புதிய வழிகாட்டு நெறிமுறைகளை அமைப்பது சாத்தியமல்ல! இது குறித்து முதலமைச்சரிடம் தெரிவிக்கப்படும்" என்று கூறினார்.
கோவையில் ஜல்லிக்கட்டு?
கரோனா அதிகரித்துவரும் நிலையில் கோவையில் ஜல்லிக்கட்டு போட்டி நடைபெறுமா என்ற கேள்விக்குப் பதிலளித்த அவர், "தென் மாவட்டங்களில் ஜல்லிக்கட்டுப் போட்டிகள் கரோனா விதிமுறைகளைப் பின்பற்றி நடைபெற்றால் அதை விதிமுறைகளைப் பின்பற்றி கோவையில் நடைபெறும்" எனத் தெரிவித்தார்.
மாதாந்திர மின் கட்டணம் செலுத்தும் நடைமுறை விரைவில் நடைமுறைக்கு வரும் தற்போதைய சூழலில் மின் கணக்கீட்டாளர் 50 விழுக்காடு பற்றாக்குறை உள்ளது. இதனால், வீடுகளுக்கு ஸ்மார்ட் மீட்டர் பொருத்தும் திட்டம் அறிவிக்கப்பட்டு அதற்கான பூர்வாங்க பணிகள் நடைபெற்றுவருகின்றன.
மின் கட்டண கணக்கீட்டுத் திட்டம்
மாதாந்திர மின் கட்டண கணக்கீட்டுத் திட்டத்தில் டிஜிட்டல் மீட்டர்களைக் கொண்டு நடைமுறைப்படுத்தினால், மின் கட்டண கணக்கீட்டுப் பணியாளர்களின் பணிச்சுமையைக் குறைக்க வாய்ப்புள்ளது.
எனவே, டிஜிட்டல் மீட்டர் பொருத்தும் பணிகள் முழுமையாக நிறைவடையும்பட்சத்தில் கணக்கீட்டாளர் பணிக்கு ஆள்கள் பூர்த்திசெய்ய அவசியமில்லை" எனக் கூறினார்.
மேலும், தேர்தல் வாக்குறுதியில் மாதாந்திர மின் கட்டணம் உள்ள நிலையில் விரைவில் வாக்குறுதிகள் நிறைவேற்றப்படும் எனத் தெரிவித்தார்.
இதையும் படிங்க: தனக்கு பரோல் வேண்டி நளினியின் கணவர் ஸ்டாலினிடம் கோரிக்கை
